Централизованная библиотечная система города Витебска

    6 чэрвеня падлеткі з профільнага лагеру гімназіі №4 імя М.І. Дзенісенкі здзейснілі гістарычную вандроўку «Славутасці роднай зямлі», прысвечаную Дню памяці Еўфрасінні Полацкай і 900-годдзю заснавання Спаса-Еўфрасіньеўскага манастыра.
   Амаль тысяча гадоў раздзяляюць нашых сучаснікаў з падзеямі, якія адбываліся ў старажытным Полацку дзякуючы Прападобнай. Але і праз далёкія стагоддзі яе імя застаецца вядомым не толькі ў Беларусі. Асоба Еўфрасінні Полацкай была прыцягальнай для многіх яшчэ і пры яе жыцці. Таму больш значным бачыцца той вялізны падмурак у гісторыі і культуры беларусаў, закладзены гэтай моцнай жанчынай.

     Жыццяпіс Еўфрасінні Полацкай вывучаюць і аналізуюць вучоныя-гісторыкі. Не так даўно з'явілася версія, што вялікая асветніца магла нарадзіцца ў Віцебску.
     Пра ўсё гэта ішла гаворка падчас вандроўкі. Падлеткі таксама пачулі ўрывак з кнігі Сяргея Кавалёва «Фрэскі» і вершы Людмілы Рублеўскай, Віктара Шніпа, Васіля Зуёнка.
     Хлопцы і дзяўчаты пазнаёміліся з выставачным праектам «Духоўны скарб Еўфрасінні Полацкай», які працягвае працаваць у чытальнай зале. Зацікавіліся кнігамі, прадастаўленымі епархіальнай бібліятэкай вялікапакутніцы Кацярыны.