Централизованная библиотечная система города Витебска

Аддаючы даніну модзе, мы часта не задумваемся - навошта гэта нам, адкуль прыйшло і куды можа прывесці? Так, у сучаснай моладзі кожны год з'яўляюцца ўсё новыя і новыя экстрымальныя забавы, вакол якіх фарміруюцца цэлыя субкультуры. Што ж прымушае маладых людзей рызыкаваць уласным жыццём? І ці ёсць альтэрнатыва нелегальнаму экстрыму? На гэтыя пытанні 2 сакавіка даў адказ урок-перасцярога "Няпэўныя подзвігі ці скачок у рэанімацыю".

Увазе чытачоў бібліятэкі імя Ул.Караткевіча, вучняў 5-х і 9-х класаў ДУА "Сярэдняя школа №34 г. Віцебска" была прапанавана інфармацыйная гутарка, сэнсам якой было расказаць пра тое, якія вынікі чакаюць тых, хто вырашае стаць зацэперам (той, хто прычэпліваецца да цягнікоў), трэйсерам (той, хто, займаецца гарадской акрабатыкай), бейсджамперам (той, хто прыгае з нізкіх вышынь з парашутам), руферам (той, хто забаўляецца на дахах дамоў) і тых, хто перабегае дарогу перад самай машынай. Пад час гутаркі гучала галоўная думка: не трэба весціся на прывабныя, на погляд моладзі, ролікі ў інтэрнэце з дэманстрацыяй ілжывага гераізму, а трэба ведаць, што часцей за ўсё гэта заканчваецца сапраўднай бядой для тых, хто ў гэтым удзельнічае.