Централизованная библиотечная система города Витебска

11 лютага споўнілася 210-гадоў з дня нараджэння Напалеона Орды – знакамітага мастака, кампазітара, піяніста, пісьменніка, які займае асобае месца сярод славутых грамадскіх і культурных дзеячоў не толькі Баларусі, а і ўсяго свету.

З гэтый нагоды ЦГБ імя М. Горкага 16 лютага запрасіла чытачоў на вечарыну-прысвячэнне "Напалеон Орда – шлях да Бацькаўшчыны". Распачалася вечарына танцавальным нумарам, які прадставілі ўдзельнікі клуба культурна-гістарычнай рэканструкцыі "Паўночная вежа". Ён перанёс гледачоў у эпоху ХІХ стагоддзя, бо менавіта да гэтага перыяду адносіцца дзейнасць Напалеона Орды.

Мультымедыйная прэзентацыя дала магчымасць прайсці жыццёвым і творчым шляхам гэтай неардынарнай асобы, акунуцца ў тую атмасферу, якая сфарміравала Орду, як грамадскага дзеяча, як мастака, кампазітара і музыканта. Напалеон Орда – майстар архітэктурнага пейзажа і падарожжа па віртуальнай арт-галерэі дало прысутным магчымасць пазнаёміцца з архітэктурай палацаў, сядзіб, храмаў, замкаў не толькі Беларусі, а і іншых еўрапейскіх краін. Уяўленне аб музычнай спадчыне Напалеона Орды даў запіс выканання яго "Паланеза". Цікавай для прысутных была інфармацыя пра тое, як ушаноўваецца памяць нашага славутага земляка ў Беларусі і за яе межамі.

Вечарына выклікала ў гледачоў зацікаўленасць і падарыла добры эмацыянальны настрой. А завяршылася гэта пазнавальная сустрэча выкананнем танца кантраданс "Пачатак кахання".