Централизованная библиотечная система города Витебска

На творчую сустрэчу з віцебскім паэтам-гумарыстам Міхасём Мірановічам 26 студзеня запрасіла сваіх чытачоў бібліятэка імя Еўдакіі Лось. Члены клуба "Сустрэча" і іншыя аматары паэтычнага слова, якія завіталі на той час у бібліятэку, засталіся вельмі задаволены.

"Гумар - справа сур'ёзная", - сцвярджае аўтар і зусім не памыляецца, бо піша свае творы аб усім, што здараецца ў нашым складаным жыцці. Невялікія карацелькі-фрашкі, напісаныя М.Мірановічам, так ёмка і дакладна адлюстроўваюць розныя жыццёвыя хібы, што застаецца толькі...пасмяяцца. І гэта з вялікай ахвотай рабілі ўсе прысутныя. Цікавым аказаўся і той факт, што Міхась Мірановіч паходзіць з той самай вёскі Старына Ушацкага раёна, дзе нарадзілася Еўдакія Лось, і калісьці яму даводзілася з ёй сустракацца.

Пад час вечарыны прагучалі і літаратурныя пародыі, на якія паэт таксама вялікі майстра. Да ўсяго, Міхась Мірановіч пазнаёміў чытачоў і з перакладамі з украінскай і польскай мовы. Напрыканцы сустрэчы жадаючыя маглі набыць кнігі і атрымаць аўтограф аўтара. А фонд бібліятэкі папоўніўся на тры асобнікі, выдадзеныя ў апошнія гады і падараваныя паэтам.