У межах Дней культуры Латвіі ў Віцебску ў цэнтральнай гарадской бібліятэцы імя М. Горкага 16 лістапада адбылася сустрэча чытачоў з прадстаўнікамі беларускага культурна-асветніцкага таварыства "Уздым" з Даўгаўпілса і членамі Віцебскага аддзялення ГА "Саюз пісьменнікаў Беларусі".
Пра дзейнасць культурнага таварыства цікава расказала яго старшыня Людміла Сінякова. Прысутныя даведалісь, што суполка існуе ўжо 20 гадоў, пры ёй створаны розныя калектывы: вакальны ансамбль "Купалінка", танцавальны калектыў "Лянок", тэатральная студыя "Паўлінка", ансамбль акардэаністаў "Квітнеючы май" і іншыя. Выходзіць газета "Уздым", выдаюцца зборнікі паэзіі, працуе нядзельная школа.
Потым Людміла Сінякова, Вольга Паўловіч, намеснік старшыні таварыства і член праўлення Таццяна Дзянісава прадставілі творчасць паэтаў, якія з'яўляюцца сябрамі таварыства: Анастасіі Сазанковай, Станіслава Валадзько, Паўла Плотнікава, Ірыны Страздонік-Плячко, Зянона Бурага і іншых.
У сваю чаргу са сваімі паэтычнымі творамі выступілі віцебскія паэты Мікалай Намеснікаў і Уладзімір Крайнеў. Сустрэча прайшла ў атмасферы цеплыні і душэўнасці.