Централизованная библиотечная система города Витебска

    Чарговы занятак гуртка «Бусляня» ў бібліятэцы імя Ул.Караткевіча «Развітанне з зімой» прайшоў 26 лютага і быў прысвечаны Масленіцы – народнаму святу праводзін зімы і сустрэчы вясны, святу сонейка і агульнай радасці.

     З казкі Раісы Баравіковай «Масленіца» і народнай казкі «Саламяная Масленіца», якія расказала бібліятэкар, стала вядома, адкуль на Беларусі пайшла традыцыя святкаваць масленічны тыдзень і паліць на агні саламянае чучала, якое сімвалічна ўвасабляла ў сабе стары год, зло і холад.

     Дзеці даведаліся таксама, чаму такая вялікая пашана блінам на Масленіцу, чаму ў гэты дзень хлопцы і дзяўчаты гушкаюцца на арэлях, чаму ў апошні дзень свята людзі адзін у аднаго просяць прабачэння, а галоўнае, зразумелі патаемны сэнс масленічных абрадаў і рытуалаў нашых продкаў.

     Напрыканцы занятка дзеці шчыравалі над аплікацыяй «Сонца-сонейка»: выразалі з паперы маленькія далоні, малявалі тварык, збіралі разам усе дэталі. У выніку атрымалася вясёлае, гарэзлівае і па-веснавому прыветлівае сонейка, якое выпраменьвае цяпло ўмелых дзіцячых рук.