Цэнтралізаваная бібліятэчная сістэма горада Віцебска

Сустрэчы юных чытачоў з вядомай беларускай дзіцячай пісьменніцай Кацярынай Хадасевіч-Лісавой, арганізаваныя выдавецкім домам "Звязда" адбыліся 17 сакавіка ў цэнтральнай гарадской бібліятэцы імя М.Горкага і бібліятэцы імя Я.Маўра.

Аўтар прэзентавала сваю новую кнігу "Сакрэты аднаго каралеўства", з'явіўшыся перад юнымі чытачамі ў вобразе гераіні сваёй казкі - Бледнай паганкі. Разам з казачным персанажам Панеёлусам дзеці завіталі ў таямнічае каралеўства, пазнаёміліся з яго жыхарамі, пагулялі ў інтэрактыўную гульню "Верыш, ня верыш". Пісьменніца вельмі зацікавіла маленькіх чытачоў прыгодамі дзіўных персанажаў іншых сваіх твораў: іншапланетніка Вухуціка, абаяльнай і вясёлай лісачкі Красуні і Жахліўчыка.Кацярына Хадасевіч-Лісавая з'яўляецца членам Саюза пісьменнікаў Беларусі і аўтарам 11 кніг для дзяцей.
Кнігі казачніцы не зусім звычайныя. Яны змяшчаюць квэсты-падарожжы, вандрульні (вандроўка+гульня) па старонках казак, QR-код, які адсылае да буктрэйлера па матывах твора. Кнігі  пісьменніцы можна знайсці ва ўсіх бібліятэках горада. Запрашаем да чытання!