Централизованная библиотечная система города Витебска

     24 лютага ў цэнтральнай гарадской бібліятэцы імя М.Горкага адбылася вечарына-прысвячэнне «Каб недзе ўспомніла жыццё цябе...» з нагоды 85-годдзя з дня нараджэння Народнага паэта Беларусі Рыгора Барадуліна.

     Кожны год мы збіраемся ў гэты дзень, каб аддаць даніну павагі таленавітаму паэту, сумленнаму грамадзяніну і патрыёту, і не толькі таму, што ён наш зямляк, ён з віцебшчыны, з ушаччыны. Барадулін – паэт неверагоднай сілы і красы, чарадзей беларускага слова, светлы, ясны, высокі і пранізлівы. У яго вершах мы не знойдзем гучных лозунгаў і заклікаў. Ён далёкі ад палітыкі. Але ён грамадзянін і патрыёт. Усё яго жыццё і творчасць – гэта "маленне за Беларусь". Бо Радзіму і родную мову любіў і зберагаў, каб было што перадать наступным пакаленням. Ён марыў, каб нашчадкі цанілі гэту спадчыну і бераглі. У Тыдзень роднай мовы вершы Рыгора Барадуліна гучалі як абразчык моўнай спадчыны, завешчанай нам і нашчадкам.

     У вечарыне прыняла ўдзел Вольга Іванаўна Русілка, паэт, выкладчыца ВДУ імя П.М.Машэрава, кандыдат філалагічных навук, дацэнт. Яе цікавы аповед пра асобу і значнасць постаці Рыгора Барадуліна, уражанні ад асабістага знаёмства з паэтам шчыра зацікавілі старшакласнікаў ДУА «Сярэдняя школа №3 г. Віцебска».