Цэнтралізаваная бібліятэчная сістэма горада Віцебска

Спектаклем па матывах казкі Ул.Караткевіча "Верабей, Сава і птушыны суд" 6 мая ў бібліятэцы імя У. Караткевіча распачаўся цыкл мерапрыемстваў, прысвечаных 85-годдзю з дня нараджэння пісьменніка, якое будзе адзначана ў лістападзе бягучага года.

У якасці артыстаў выступілі наведвальнікі групы падоўжанага дня ДУА "Сярэдняя школа №11 г. Віцебска" (выхавацель Валянціна Іванаўна Дзяржаўцава), а гледачамі - навучэнцы 1 "Б" класа той жа школы, а таксама хлопчыкі і дзяўчынкі са старэйшай групы дзіцячага сада №72.

Дэкарацыі і касцюмы да спектакля падрыхтавала мастак Вольга Шышло, за музычнае афармленне адказвала кампазітар Надзея Несцярэнка. На працягу ўсяго дзеяння гучала музыка, артысты танчылі і спявалі песні. Гледачы з цікаўнасцю сачылі за падзеямі, якія адбываліся ў птушынай дзяржаве.