11 і 13 сакавіка ў бібліятэцы імя Е. Лось прайшоў літаратурны агляд, прысвечаны Году якасці. Яго ўдзельнікамі сталі вучні 4 «А» і 4 «В» класаў гімназіі №4.

  Добрая кніга ў любыя часы з'яўляецца надзейным сябрам і дарадчыкам для таго, хто цягнецца да ведаў, імкнецца да самаразвіцця. Знайсці неабходнае і самае цікавае патрабуе пэўнага часу. Таму знаёмства з літаратурай ў бібліятэцы – магчыма, адзін з лепшых шляхоў.
  Чацверакласнікам былі прадстаўлены новыя кнігі, якія зусім нядаўна з'явіліся на паліцах. Вядома, яны розныя па тэматыцы, жанраваму віду і прызначэнню. Што значыць, для кожнага юнага чытача ёсць магчымасць знайсці менавіта «сваё» выданне.
  Цікавы аповед і шмат матэрыялаў, якія расказваюць пра ўнікальную экспедыцыю па Заходняй Дзвіне, змешчаны ў кнізе Святланы Дзядзінкінай і Сяргея Кавалеўскага «Рака памяці». Своеасаблівы каляндар народных святаў і традыцый прадстаўлены ў выданні Марыны Кузьміч «Сонцаварот». Для аматараў прыроды будзе цікавым чарговы асобнік з серыі «Белорусская детская энциклопедия» – «Загадочный мир белорусской природы. Тайная жизнь растений» Анатоля Бярнацкага. І, канечне, на розны густ мастацкая літаратура. Гэта і прыгоды, і дэтэктыўныя гісторыі, і казачныя аповесці, якія дапамогуць добра бавіць вольны час.