З 6-га па 31-га сакавіка ў бібліятэцы імя Ул. Караткевіча праходзіць выстава творчых работ «Чароўная кветка» студыі саломапляцення ДУ «Культурна-гістарычны комплекс «Залатое кола г. Віцебска «Дзвіна», мастацкі кіраўнік Людміла Вараб'ёва.

На выставе прадстаўлены пано, на якіх выявы ружаў і сланечнікаў, галаўныя уборы (вяночкі), у якія ўплецены фантазійныя кветкі, аплікацыі з рознакаляровымі цюльпанамі, букеты, састаўленыя з касачэй і рамонак, лілей і валошак, мячэўніка і сланечнікаў. Работы выкананы ў смешанай тэхніцы, а таксама выкарыстоўвалася плоскае і аб'ёмнае пляценне. Назвы работ «Дыханне вясны», «Вясновы настрой», «Гукаю вясну» вызначаюць галоўную тэму выставы «Вясна, сонца, квітненне» і запрашаюць палюбавацца незвычайнай прыгажосцю, якая створана «залатымі» рукамі таленавітых майстроў.