Свята "Да кнігі спрадвеку любоў і павага" для навучэнцаў 1-х класаў УА "Сярэдняя школа № 46 г. Віцебска" 6 красавіка арганізавала бібліятэка імя Ул. Караткевіча. Вучням расказалі пра асобу і творчасць сусветна вядомага дацкага казачніка Ганса Хрысціяна Андэрсена, чый дзень нараджэння, 2 красавіка, стаў датай святкавання Міжнароднага дня дзіцячай кнігі, і па казках якога вучылася чытаць не адно пакаленне дзяцей розных краін свету.

Мультымедыйная прэзентацыя пазнаёміла прысутных з тым шляхам, які прайшла кніга ад рукапіснай да сучаснай, з музеем беларускага кнігадрукавання ў Полацку, з самымі прыгожымі і вялікімі бібліятэкамі і асобна з Нацыянальнай бібліятэкай у Мінску. Потым дзецям расказалі пра бібліятэку імя Ул. Караткевіча, а агучанае слайд-шоў пазнаёміла з тым, як весела, цікава і пазнавальна чытачы праводзяць там свой вольны час.

Напрыканцы свята дзеці прынялі ўдзел у конкурсе на самага ўважлівага і начытанага "Разумнікі і разумніцы" і, дзякучы яму, успомнілі сюжэты і герояў любімых кніг.