Займальным падарожжам "Мудрых гісторый вечнае святло" па казках Ул. Караткевіча ў бібліятэцы, якая носіць яго імя, 17 лістапада распачаліся дні літаратуры з нагоды 86-гадавіны з дня нараджэння пісьменніка.

Для малодшых школьнікаў, а гэта былі навучэнцы ДУА "Гімназія №3 г. Віцебска імя А.С. Пушкіна" прагучалі ўрыўкі з чароўных казак, у якіх Уладзімір Караткевіч раскрыўся як цудоўны апавядальнік з дзівоснай фантазіяй. Разам з бібліятэкарам дзеці аналізавалі прачытаныя тэксты і знаходзілі ў іх зярняткі дабрыні і народнай мудрасці, якімі так багата насычаны кожны твор пісьменніка, бралі ўдзел у гульнях па сюжэтах казак "Чортаў скарб", "Жабкі і чарапаха", "Кацёл з каменьчыкамі".

Непаўторная мова, дасканалы стыль, а таксама любоў і прага да жыцця, што нясуць з сабою героі казак Ул. Караткевіча – ўсё гэта з самага пачатку падарожжа захапіла яго маленькіх удзельнікаў і выклікала жаданне бліжэй пазнаёміцца з творчасцю пісьменніка.