З 12 студзеня ў бібліятэцы імя У. Караткевіча праходзіць выстава творчых работ «Зіма малюе кветкамі ўзоры» народнага клуба аматараў фларыстыкі «Анюта» культурна-гістарычнага комплексу «Залатое кола г. Віцебска» «Дзвіна».

  На выставе прадстаўлена 33 карціны, выкананых 17 майстрамі–фларыстамі. Гэта не толькі маляўнічыя пейзажы, карціны з выявамі птушак і звяроў, але і кветкавыя кампазіцыі, якія нагадваюць зімовыя ўзоры. Традыцыйна ў стварэнні зімовых фларыстычных карцін выкарыстаны лісце і пух срэбнай таполі, лісце маліны, цынерарыі, часночныя шалупіны, шкарлупіны яек, фрагменты асінага гнязда, водарасці. Выстава знаёміць гледача з разнастайнымі тэхнікамі: фларыстычная графіка, змешаная тэхніка, калаж, фларыстычны вітраж. І якую б тэхніку не выбраў майстар – гэта заўсёды непаўторны гарманічны саюз мастака і прыроды. Карціны грунтуюцца на прынцыпах выяўленчага мастацтва, толькі замест фарбаў напісаны лісцямі і пялёсткамі. Кожны аўтар на палатне раскрывае асабістае бачанне зімовай пары і захапленне прыгажосцю роднай прыроды. Запрашаем наведаць выставу і падзівіцца майстэрству таленавітых фларыстаў.