Свята адкрыцця Тыдня дзіцячай кнігі з удзелам Тамары Красновай–Гусачэнка адбылося 30 сакавіка ў бібліятэцы імя У. Караткевіча. У цэнтры ўвагі свята стала новая кніга паэтэсы "Навагоднія прыгоды Марусі", па матывах якой бібліятэкары паставілі спектакль.

Ролі выканалі навучэнцы 4 "А" і 4 "Б" класаў ДУА "Гімназія №3 імя А.С. Пушкіна г. Віцебска", за музычнае афармленне адказвала кампазітар Надзея Несцярэнка. Тэатралізаванае прадстаўленне пачалося з незвычайнага здарэння, якое адбылося са звычайнай дзяўчынкай. Пад час спектакля прагучала пяць новых песень Надзеі Несцярэнкі на словы Тамары Красновай-Гусачэнкі ў выкананні дзяцей і спявачкі Вольгі Секунды.

Пасля заканчэння спектакля Тамара Краснова-Гусачэнка пачытала дзецям загадкі з кнігі, якая хутка выйдзе з друку, падзялілася з аўдыторыяй сваімі планамі.