IMG 3386З 10 па 26 лістапада ў бібліятэцы імя Уладзіміра Караткевіча праходзяць Дні літаратуры, прысвечаныя жыццю і творчасці выдатнага пісьменніка. Святочныя мерапрыемствы адкрыла паэтычная гадзіна "Бяру натхненне ў крыніцы" з удзелам віцебскай паэтэсы, лаўрэата прэміі імя Ул. Караткевіча, Вольгі Русілкі.

Вольга Іванаўна ўспомніла пра сустрэчы з Уладзімірам Караткевічам падчас вучобы ў Беларускім дзяржаўным універсітэце і прызналася, што лічыць яго сваім духоўным настаўнікам. Аўдыторыі, навучэнцам 9-х і 11-х класаў СШ №11, былі прадстаўлены кнігі паэтэсы "Табе", "Ажына", "В.І.Р.", "Сцежка, сцежачка, сцяжынка". Вольга Русілка расказала пра сябе, сваю творчасць, пачытала вершы, лірычныя мініяцюры, гумарыстычныя замалёўкі і нават правяла своеасаблівую віктарыну на веданне беларускай мовы, прызамі да якой сталі зборнікі яе вершаў. Мерапрыемства пачалося і закончылася на лірычнай ноце: прагучала аўтарская песня Вольгі Русілкі "Гэта восень".