Экскурсія і гутарка па выставе выцінанкі «Унікальныя ўзоры ад роднай зямлі» галоўнага мастака ДУ «Віцебскі абласны цэнтр народнай творчасці» Ганны Перлінай прайшла 12 лютага ў бібліятэцы імя Ул.Караткевіча для вучняў 3-х класаў ДУА «Сярэдняя школа №11».

    Дзецям расказалі пра работы таленавітага папяровага скульптара, створаныя па матывах экспедыцыйнай дзейнасці, а таксама пра фантазійныя, аўтарскія. Увагу вучняў звярнулі на работы, у якіх знайшоў адлюстраванне вобраз дрэва жыцця, і нагадалі звязаныя з ім народныя паданні і легенды.

      Аповед пра выцінанкі з выявамі жураўлёў (прызнанне мастачкі ў любові да малой радзімы – Міёршчыны) дапоўніў прагляд відэароліка «Танец жураўлёў». Вучні даведаліся ў якой краіне з'явіліся першыя выцінанкі, але асаблівая ўвага была нададзена гісторыі паходжання гэтага віда народнага дэкаратыўна-прыкладнога мастацтва на тэрыторыі нашай краіны, у беларускай вёсцы.

   Дзецям прадставілі кнігі, у якіх расказваецца пра асноўныя рысы народнай выцінанкі, пра узоры для будняў і для свята ў афармленні сялянскага інтэр'ера, пра спосабы складвання і прыёмы выразання. Разглядзеўшы, прапанаваны ў кнігах дадатковы практычны матэрыял у выглядзе лякалаў, вучні і самі змаглі выразаць ажурнае сардэчка да Дня святога Валянціна.