Гадзіну роднай мовы правялі для вучняў 2«В» класа ДУА «Сярэдняя школа №2» супрацоўнікі бібліятэкі імя Я.Маўра 5 лютага.

     У атмасферы добразычлівасці прайшла размова пра гісторыю ўзнікнення Дня роднай мовы, пра неабходнасць яе захавання. Вучням нагадалі, чым ганарацца жыхары нашай краіны: гераічным мінулым, багатай культурнай спадчынай, чароўнай прыродай. 

   Дзецям прапанавалі напісаць на пялёстках рамонка заканчэнне фразы «Маю Беларусь я называю...», пазбіраць са словазлучэнняў прыказкі і прымаўкі, перакласці словы і крылатыя выразы з рускай мовы на беларускую і наадварот.

     Вучні з задавальненнем прымалі ўдзел у моўных гульнях і конкурсах. У гульне «Скарбонка роднай мовы» дзеці пісалі свае самыя любімыя беларускія словы, спаборнічалі ў конкурсе «Назаві самае прыгожае беларускае слова», чыталі вершы на роднай мове.

     Свята запомнілася ўсім. Кожны вучань зразумеў, што трэба любіць і шанаваць родную мову, бо менавіта ў мове захавана гісторыя нашага народа, сіла і краса народнага слова.