11 красавіка ў бібліятэцы імя Ул. Караткевіча для вучняў пачатковых класаў СШ №11 адбылося падарожжа па кнізе Тамары Красновай-Гусачэнкі "Рабінзоны з Прыдзвіння" з удзелам паэтэсы.

Гэта кніга - дзіўная казка-падарожжа пра Пецю і Дашу, якія жылі летам у вёсцы на беразе Дзвіны. Выданне ў мінулым годзе паступіла ў бібліятэку і адразу спадабалася маленькім чытачам, таму што яно па-сапраўднаму дзіцячае і па зместу, і па афармленню.

Вучні 2 "Б" класа праінсцэніравалі прыгоды рабінзонаў, а наведвальнікі групы падоўжанага дня выканалі песні "Навагодняя", "Мамачцы", "Восеньская" кампазітара Надзеі Несцярэнка. На мерапрыемстве таксама прагучалі песні "Дзве сястры" і "Восень маладая" у выкананні спявачкі Вольгі Секунды. Усе песні на словы Тамары Іванаўны, былі арганічна ўпісаны ў канву літаратурнай кампазіцыі. Гісторыя, расказаная ў кнізе і паказаная ўдзельнікамі мерапрыемства, вучыць цаніць сяброўства, дапамагаць дарослым, быць клапатлівымі, шчодрымі, спагадлівымі, не ленавацца, с жаданнем працаваць і вучыцца. Ў сваім выступленні Тамара Краснова-Гусачэнка расказала і пра іншыя кнігі, напісаныя для дзяцей, і нават раскрыла сюжэтныя лініі новых казачных гісторый і канцэпцыі новых сборнікаў вершаў, якія яшчэ рыхтуюцца да выдання.