Централизованная библиотечная система города Витебска

    11 чэрвеня ў бібліятэцы імя Ул.Караткевіча прайшла інфармацыйная гадзіна «Перліны роднага краю», якая раскрыла таямніцы сямі цудаў Беларусі.

    Наведвальнікі летняга лагера "Эўрыка" ДУА «Сярэдняя школа №28» даведаліся пра гісторыю існавання Белавежскай пушчы як запаведніка, пра ўнікальнасць яе флоры і фауны. Аповед пра крэпасць у Бабруйску пачаўся з моманту яе будаўніцтва, прысутныя даведаліся пра далейшае яе аснашчэнне, якое было зроблена па апошняму слову еўрапейскай фартыфікацыі і дазволіла гарнізону вытрымаць чатырохмесячную асаду арміяй Напалеона.

    Падлеткам карысна было паслухаць пра заснаванне і канструкцыю Брэсцкай крэпасці, пра заключэнне ў ёй Брэсцкага мірнага дагавору і, вядома, пра яе гераічную абарону ў 1941 годзе. Шмат цікавых фактаў было агучана пра архітэктурныя асаблівасці касцёла ў вёсцы Будслаў, Мірскага замка і Сафійскага сабора. Дзеці адкрылі для сябе непаўторную прыгажосць азёр Нарачанскага краю, авеянага цудоўнымі беларускімі легендамі і паданнямі. Падлеткам прадставілі кнігі А.Бутэвіча з серыі «Сем цудаў Беларусі»: «За наміткай гісторыі», «У гасцях у вечнасці», «Адвечны покліч Радзімы», таксама кнігу У.Ягоўдзіка «Сем цудаў Беларусі», з якіх можна даведацца падрабязней пра гэтыя і іншыя помнікі прыроды і чалавечага генія.