Тэма гульняманіі, нарказалежнасці ад відэагульняў стала галоўнай на гадзіне бяспекі «Выхад з гульні – праблема стагоддзя», якая прайшла 20 мая ў 6«Б» класе ДУА «Сярэдняя школа №6 г. Віцебска».

    Гэту з'яву называюць па-рознаму: гульняманія, нарказалежнасць ад відэагульняў, гульнявая залежнасць і г.д. Сёння чалавек праводзіць шмат часу ў віртуальным свеце, а ў звычайным жыцці адчувае сябе не вельмі ўпэўнена. Больш таго, адлучэнне ад камп'ютара суправаджаецца агрэсіяй, а таксама іншымі псіхаэмацыйнымі праявамі, якія ўласцівы нездароваму чалавеку.

    Супрацоўнік бібліятэкі імя Ул.Караткевіча растлумачыў, што асаблівую шкоду камп'ютарныя гульні наносяць падлеткам: іх неакрэплая псіхіка за лічаныя дні паддаецца негатыўнаму ўплыву і фарміруецца гульнявая залежнасць, якая патрабуе дапамогі кваліфікаванага ўрача. На абмеркаванне вучняў былі вынесены рэальныя, часам трагічныя гісторыі, у якіх анлайн-гульня літаральна зламала падлеткам і іх блізкім жыццё. Напрыканцы размовы бібліятэкар прывяла прыклады цікавых, крэатыўных спосабаў барацьбы з камп'ютарнай залежнасцю ў розных краінах свету.