Централизованная библиотечная система города Витебска

21 сакавіка, у Сусветны дзень паэзіі, у Цэнтральнай гарадской бібліятэцы імя М. Горкага адбылася ўрачыстасць з нагоды ўручэння “Літаратурнай прэміі імя Петруся Броўкі”, заснаванай Віцебскім абласным выканаўчым камітэтам. Імя народнага паэта Беларусі Петруся Броўкі даўно ўвайшло ў гісторыю беларускай літаратуры. Ён пакінуў багатую літаратурную спадчыну, цікавась да якой не згасае праз гады. З мэтай ушанавання памяці знакамітага пісьменніка-земляка ў 2012 годзе і заснавана літаратурная прэмія, якая носіць яго імя.

Прэміі першым лаўрэатам уручыў намеснік начальніка Упраўлення культуры Віцебскага аблвыканкама Пётр Мікалаевіч Падгурскі: у намінацыі “Паэзія” – Т. І. Красновай-Гусачэнка за кнігу “У света тени нет”, у намінацыі “Проза (у тым ліку публіцыстыка і драматургія)” – Ф. А. Палачаніну за кнігу “Шлях да бога”, у намінацыі “Літаратура для дзяцей” – Г. У. і С. А. Трафімавым за кнігі “Букварь Оршанский”, “В мире зелёных чудес”, “Они не должны исчезнуть”, “Яичные загадки и разгадки”, “Почемучкам о слезинках”, “Отчего небо голубое, а море синее?”, “Оранжевое диво”. Ім былі ўручаны дыпломы, кветкі і грашовая прэмія.

Са словамі віншавання лаўрэатаў выступілі - ганаровы член Саюза пісьменнікаў Беларусі Б. П. Беляжэнка і загадчыца гарадской бібліятэкі імя П. Броўкі Л. А. Шашкова. У невялікім канцэрце ў гонар узнагароджаных бралі ўдзел ансамбль цымбалістаў музычнага каледжа імя І. Салерцінскага “Гарэзлівыя перазвоны”, дуэт цымбалістаў дзіцячай школы мастацтваў імя А. Багатырова, а таксама пераможцы літаратурнага конкурсу «Души прекрасные порывы».