"І дум, і мар дзіцячых капітан" – літаратурная гадзіна пад такой назвай, прысвечаная 135-годдзю з дня нараджэння класіка беларускай дзіцячай літаратуры Янкі Маўра, адбылася 2 сакавіка ў бібліятэцы, якая носіць яго імя, для навучэнцаў 6 "А" класа сярэдняй школы №31.

Мультымедыйная прэзентацыя асвятліла і раскрыла розныя бакі жыцця Янкі Маўра. Школьнікі даведаліся пра дзіцячыя гады Янкі, сапраўднае прозвішча якога - Фёдараў, пра адносіны яго да маці. Ім расказалі пра пачатак яго творчасці, пра гісторыю псеўданіма "Янка Маўр". Дзеці паглядзелі ўрывак з дакументальнага фільма пра жыццё выдатнага беларускага пісьменніка. Іх увазе быў прапанаваны буктрэйлер па аповесці "Палескія рабінзоны", якая зрабіла Янку Маўра любімым дзіцячым пісьменнікам, "капітанам дзіцячых падарожжаў".

Скончылася літаратурная гадзіна словамі пісьменніка пра значэнне кнігі: "...Яны мне адкрылі свет і людзей, яны абудзілі тое, што пасля назвалі творчай фантазіяй. Дык і нам усім трэба клапаціцца, каб унукі і праўнукі, сённяшнія і заўтрашнія малыя чытачы нашы, сказалі, як вырастуць, што ўсім добрым яны абавязаны кнігам".