Централизованная библиотечная система города Витебска

У 2018 годзе бібліятэка імя Ул. Караткевіча працягвае рэалізацыю праекта "Бяспечнае асяроддзе – шчаслівыя дзеці" . У лютым удзельнікамі мерапрыемстваў, накіраваных на фарміраванне навыкаў бяспечных паводзін дзяцей і падлеткаў на вуліцы, дома, у школе, у экстрымальных сітуацыях, сталі вучні ДУА "Сярэдняя школа № 34 г. Віцебска".

20 лютага з вучнямі 5 "Б" класа на гадзіне карысных парад "Калі ты адзін дома" ішла гаворка пра асноўныя правілы бяспечных паводзін у сваім жыллі. Разам з вучнямі былі разабраны ўсе небяспечныя сітуацыі, якія могуць узнікнуць, пачынаючы з пад'езда і ліфта і заканчваючы патэнцыяльнымі небяспекамі ў кватэры: вострыя і рэжучыя прадметы, электрычныя і газавыя прыборы, бытавая хімія і лекі.

19 лютага для вучняў 5 "А" класа прайшла гадзіна бяспекі "Сказочный дом и безопасность в нём". Дзеці ўспаміналі змест казак і адказвалі на пытанні па бяспецы жыццядзейнасці. Вучні не толькі называлі памылкі, якія дапусцілі Чырвоная Шапачка, Бураціна, Калабок, але і прапаноўвалі іншыя варыянты развіцця падзей, мадэліравалі сітуацыі са шчаслівым фіналам.

Навуцы выжывання ў эпіцэнтры прыроднай, тэхнагеннай і іншых катастроф быў прысвечаны ўрок бяспекі " Выратавальны круг", які прайшоў 20 і 21 лютага з удзелам вучняў 6 "Б", 6 "А", 5 "В" класаў. Удзельнікі ўрока атрымалі не толькі карысную інфармацыю, але пры дапамозе ралявых гульняў паспрабавалі адшукаць спосабы выхаду з розных сітуацый.