Тэхналогіі вырабу беларускай народнай цацкі - Масленіцы - быў прысвечаны чарговы занятак гуртка "Бусляня", які адбыўся 5 лютага ў бібліятэцы імя Ул. Караткевіча.

Юныя чытачы даведаліся, што раней у кожнай хаце прысутнічала хатняя лялька Масленіца. Рабілі яе з саломы, лыка, кужалю, а таксама з тканіны, нітак або паперы. Масленіца лічылася абярэгам, захавальніцай сямейнага ачага, абаранцай усіх членаў сям'і. Яе можна было ўбачыць перад уваходам у хату ці на куце. Роўна год яна знаходзілася ў хаце, а затым на свяце палілася ці пускалася па вадзе.

Бібліятэкар пазнаёміла дзяцей з кнігамі: Т.А. Церашкевіч "Лялька беларуская", Г.К. Качан "Лялькі: абярэгі, абрадавыя, гульнявыя", А.І Сачанка "Да бабулі на вёску", якія распавядаюць пра асаблівасці вырабу лялек на Падзвінні, пра неабходныя кухонныя прылады для выпякання самых смачных бліноў, якімі частуюцца на Масленіцу.

Напрыканцы занятка гурткоўцы з каляровай паперы зрабілі ляльку Масленіцу, тым самым змаглі дакрануцца да вытокаў народнага майстэрства, зразумелі патаемны сэнс масленічных абрадаў і рытуалаў нашых продкаў.